ஒருநாள் வெளியூர் சென்றிருந்தபோது, எதிர்பாராதவிதமாக எனக்கு வயிற்றில் ஒரு எரிச்சலும் வலியும் ஏற்பட்டது. வலி தாங்க முடியாமல், அருகில் இருந்த ஒரு மருந்தகத்திற்குச் சென்று, வயிற்று எரிச்சலுக்காக மாத்திரை கேட்டேன். அங்கே இருந்த விற்பனையாளர், எந்தப் பெயரும் இல்லாத, அட்டை இல்லாத மாத்திரைகள் சிலவற்றைக் கொடுத்தார். "மூன்று வேளைக்குச் சாப்பிடுங்கள், சரியாகிவிடும்," என்று சொன்னார்.
அவர் சொன்னபடியே அந்த மாத்திரைகளைச் சாப்பிட்டேன். ஆனால், ஆச்சரியப்படும் வகையில் என் வயிற்று எரிச்சல் குறையவில்லை, மாறாக அதிகமாகியது. பயந்துபோன நான், உடனே ஒரு மருத்துவரைச் சந்தித்து ஆலோசனை கேட்டேன். மாத்திரைகளைக் காட்டியபோது, அந்த மருத்துவர் கூறியது எனக்கு அதிர்ச்சியாக இருந்தது.
"இந்த மாத்திரைகள் வயிற்றுப் புண்ணுக்காகக் கொடுக்கப்படுவது அல்ல, இவை வாயுப் பிரச்சனைக்காக இருக்கலாம்" என்றார். மேலும், "மருந்து மாத்திரையின் பெயர்களைத் தெரிந்துகொள்ளக் கூடாது என்பதற்காகப் பெயரில்லாத, அட்டை இல்லாத மாத்திரைகளைத் தருகிறார்கள். இவை பெரும்பாலும் காலாவதியான மாத்திரைகளாகக் கூட இருக்க வாய்ப்புள்ளது" என்றுக் கூறினார்.
உடனே அவர் பரிந்துரைத்த மருந்துகளை எடுத்துக்கொண்ட பிறகு, என் வலி முழுமையாகக் குறைந்தது. சரியான சிகிச்சையால் ஒரிரு நாளில் நான் நலமடைந்தேன்.
எனக்கு ஏற்பட்ட இந்த அனுபவம் ஒரு விழிப்புணர்வை ஏற்படுத்தியது. நாம் எப்போதும் மருத்துவரின் பரிந்துரை இல்லாமல், பெயர் தெரியாத, அட்டை இல்லாத மாத்திரைகளை வாங்கிப் பயன்படுத்துவதைத் தவிர்க்க வேண்டும். ஒருவேளை அவசர காலத்தில் பயன்படுத்தினாலும், அது காலாவதியானதா, சரியான மருந்துதானா என்பதை ஒருமுறைக்கு இருமுறை உறுதி செய்துகொள்ள வேண்டும். ஏனெனில், ஒரு சிறிய கவனக்குறைவு நமக்கு பெரிய ஆபத்தை விளைவிக்கக்கூடும்.
கருத்துகள் இல்லை:
கருத்துரையிடுக